Аал уотум иччитэ

Бырдьа бытык кырдьаҕас

Хатан Тэмиэрийэ эһэккэм

Уот Уххан Убайым

Эһигини айах тутан

Баай барыылаах

Байанай тойон эһэккэбиттэн

Көрдөһөн-ааттаһан

Тобуктаан туран тонхонноотоҕум

Алгыс анаан айгыһыннаҕым

Сүүрэр атахтааххын

Иннибэр элэҥнэт

Көтөр кынаттааххын

Үрдүбэр үмүрүт

Сырыыларбын сыалаа, арыылаа

Хонуктарбын хоонньолоо

Өрөр күөспүн хоргуннаа

Өттүк харалаа

Илии тутуурдаа

Аал уотум

Хара тыам иччилэрэ

Кудук гынан кэһиилээн

Сэгэс гынан сэмсэлээн

Күлүм гынан күндүлээн

Мичик гынын маанылаан

Иччилэрим, үрдүк ааккытыгар

Сүгүрүйэн тураммын

Алҕаатаҕым буолуохтун

Үөрүҥ-көтүҥ

Күлүм аллайыҥ

Хара суор тумса хаанырдын

Алгыс баһа сыаланнын

Дом!